Jokin Erkorekaren “Banda” liburuaren aurkezpena

Aldizkari honen editore den Jokin Erkorekak Banda (Erein, 2021) argitaratu berri du, XIII. Bilboko Uria – Blas de Otero saria irabazi ondoren lan beronekin. Igor Estankona poetaren hitzetan, “Jokin Erkorekak liburu bat idatzi du harrimenezkoa eta kultua, sentibera eta gordina […] Hemen ez dago lehenaldirik ez etorkizunik, oraina baino ez […] Publikoak amaieran beste bat eskatuko du: beste poema bat”.

Lana aurkeztuko du bihar, azaroaren 19an, Bidebarrietako liburutegian, arratsaldeko 18.00etan, Uxue Razkin eta Irati Iturritza idazleen laguntzaz. Hona liburua zabaltzen duen poema.

_____________________
BELTXARGA-KANTA

Has gaitezen
behar bezala:

alboratu eginen naiz
txinaurrien eresia ez oztopatzeko,
bide emateko eguzki-inar erradiaktiboei,
barruan entzun dadin kanpoko iskanbila;

erditik tolestuko naiz
arbasoei burugaineko koro zimela
eta ondorengo belaunaldiei sudurzulo iletsuak erakusteko
gaizki interpretatu daitekeen
belaunikatze batean;

angelu ezinezkoa egingo dut
herriaren ingerada marrazteko
gizakiz beteriko mapan;

hau guztia eta gehiago
ulertu beharra dut

munduarentzako
beltxarga-kanta bat
asmatzeko.

Banda Erein argitaletxearen azken erreferentzia da. Erein-en online dendan lor dezakezu.