Hitz mutuak IV: Ilunsentia

Ordulariari begiratu diot. Hogei minutu pasatxo dira seietatik. Afaria prestatuko dut. Baratxuri zopa. Lehengaiak gozo gozo irakiten utzi eta mahaira itzuli naiz. Telefonoari begiratu diot, akaso seme edo alabaren deiaren esperoan? Ez dakit.

Ia bada urtebete alabak azkeneko aldiz deitu zidanetik. Deia etorri zait gogora.

– Kaixo ama! Zelan? –Pozik zegoela zirudien, ohikoa baino ahots eztiagoarekin hitz egin baitzidan.

– Ondo, hementxe, betiko martxan, oraintxe etxean sartzen, Marianjelesekin askaltzeko geratuta bait nengoen. Zuek zer moduz? eta umeak? –Zertarako esan etxean pasa nuela ia egun guztia? Erritan egiteko? Tira, tira, nahiago nuen lagun zahar batekin arratsalde pasa izan nintzela esan. Portzierto, bizirik ote da Marianjeles? pentsatu nuen neure kolkorako.

– Bai… badakizu, txikitxo hau ez da geldi une batez ere egoten eta… leher eginda egia esan, baina bestela dena ondo. Aspaldi ez duzu ikusi eta aldatuta daudela jabetuko zara hurrengoan –haurra zain nezala eskatu behar zidala ohartu nintzen– zera… Jokin eta biok Errioxako ardotegi batera asteburu pasa joatekotan gara, eta… zurekin utz dezakegu umea ezta? Mila esker ama! Ostiral arratsaldean ikusiko gara, muxu bat! –berehala eskegi zuen telefonoa. Banekien.

Nire baiezkorik jaso gabe bere buruari berretsi al zion? Hala dirudi.

Erre usainak pentsamenduetatik errealitatera itzuli nau. Albora begiratu dut. Lapikotik ateratzen den keak ez du batere itxura onik. Zopa itsatsi zait. Su biziegian ote neukan? Ur gutxiegi agian?

Arraska urez bete eta lapikoa beratzen utzi dut, garbiketa lana samurragoa izan dadin. Kontserbako sardina lata bat irekitzekotan egon naiz, baina arrautza bat frijitzea pentsatu dut. On egin.

→ Leer fragmento siguiente Hitz mutuak V: Gaua

← Leer fragmento anterior Hitz mutuak III: Arratsaldea

← Leer desde el principio

_
Texto de Jon Munduate, primer premio del XXV certamen de relato corto en modalidad euskera.
Fotografía “Sigamos adelante” de Xabier Mendizabal, primer premio del XXII certamen de fotografía Hermano Oroz en modalidad blanco y negro.